تحــــــــــــــــرش جوايا-الجزء الأول

…اخترت عنوان غريب انا نفسى مش عارفه يعنى ايه تحرش جوايا بس حسيت ان ده اقرب معنى ممكن يعبر عن اللى جوايا

انا بخاف من التحــــــــــــرش

يمكن علشان حصلى كتير
!او يمكن علشان بدمر لما حد يلمسنى ؟
!بحاول افهم انا ليه الموضوع مأثر معايا كده ؟
!بحاول افتكر انا ليه بخاف وانا ماشيه لوحدى ؟
لما بكون فى زحمه بحس ان كل الناس اللى حوليه هتتحرش بيه
ولما بكون ماشيه لوحدى بقعد أتلفت حوليه زى الحرمية وبحس ممكن حد يجى من ورائى ويلمسنى
!الموضوع وصل معايا بشكل ده ؟
!!!!!ليه؟  

ده السؤال اللى بقالى كتير بدور على الاجابه بتاعته
قاعده مع نفسى وقاعده افتكر ايه اللى جرالى يمكن اقدر اعالج نفسى

انا بروح تقريبا كل الاماكن من وانا صغيره لوحدى
كنت بلعب كره سله وانا عندى تقريبا 8 سنين
وانا اصغر اخواتى اخويه وصلنى مره واحده النادى ومحدش كان فاضى يوصلنى بعد كده

انا حبيت اوى كره السله و استمريت اروح النادى كنت فى ثالثه الابتدائى بظبط
….انا بفتكر
!!بفتكر ايه اللى حصلى لما ابتديت اتعامل مع الناس فى الشارع
كنت بركب ميكروباصات لان اسرتى اسرة متوسطة الحال
..يعنى مش هينفع اركب تاكسى كل تمرين

اول موقـــــــــــــــــــــــــــــف
بفتكره دلوقتى وانا مصدومه
كنت راجعه من التمرين ومبسوطة جدا لابسه بدى اصفر فاكره الموقف اكنوا دلوقتى كنت فى ثالثه ابتدائى
!!قاعدة جنب راجل قد جدى …مكنتش فاهمه يعنى ايه حد يعملى حاجه كنت صغيره صغيره اوى
!!راح الراجل اللى قد جدى ده حط ايده على راجلى وبعدين على صدرى اللى لسه بيطلع
مكنش لسه عندى صدر بس هو حط يده على صدرى
وانا قاعدة اشيل ايده بمنتهى البراءه و هو يحطها تانى على صدرى وعلى رجلى
نزلت من الميكروباص بعيد عن بيتى وقاعدة اجرى فى الشارع واعيط بشكل هستيرى اكينى حد ضربنى

انا مكنتش فهمه ايه اللى حصلى فعلا
كنت حاسه احساس مضايقنى او احساس ان حد جرح طفولتى البريئه
يمكن اكون حكيت الموضوع ده لأختى بس مش بنفس الطريقه أو مش بنفس التفصيل دى
!علشان انا مكنتش عايزه افتكر اللى جرالى
..بس لازم اواجه نفسى يمكن مخفش تانى وانا ماشيه فى الشارع

لقراءة الجزء الثاني من تحرش جوايا اضغط هنا

المصدر: مدونة يوميات كائــــن حى

facebooktwitterlinkedin Sharing is Caring - شير في الخير

Leave a Reply

Your email address will not be published. Required fields are marked *